Kryetari i Kuvendit, Kadri Veseli ka kujtuar me nderim rënien e heroit të Kosovës, Shaban Polluzha.

Veseli i cili sot ka bërë homazhe para varrit të heroit kombëtar, ka thënë përmes një statusi në Facebook se shëmbëlltyra e Shaban Polluzhës u kthye në frymëzim të lëvizjes kombëtare për liri të Kosovës, shkruan Arbresh.info.

Lëxoni të plotë statusin e tij:

Sot kujtojmë me nderim rënien e heroit të Kosovës, Shaban Polluzha. Në dimrin tragjik të vitit 1945, ky burrë i madh i Kosovës, u priu mijëra djemve trima në kryengritjen e parë antikomuniste në Evropë. Kryengritja e Drenicës nxori në dritë karakterin brutal dhe antishqiptar të Jugosllavisë komuniste. Partizanët e Titos rrafshuan mbi 40 fshatra e vranë mijëra civilë të pafajshëm, por shëmbëlltyra e Shaban Polluzhës u kthye në frymëzim të lëvizjes sonë kombëtare për lirinë e Kosovës./Arbresh.info